Musikagileak, Euskal Herriko Musikagileen Elkarteak, Musikagileak Musika Garaikidearen Zirkuituaren XII. edizioari hasiera emango dio ostegunean, irailaren 23an, Bilbao Orkestra Sinfonikoak (BOS) eskeiniko duen inaugurazio kontzertuarekin. Pablo Rus Brosetak zuzenduko du orkestra duela gutxi sortutako lau musika-lanetan, eta horietako bat, Isabel Garmendiaren "Oroimenak", erabateko estreinaldia izango da gainera. Emanaldia 20:00etan hasiko da Bilboko Campos Eliseos Antzokian. Sarrerak Campos Antzokiko webgunean edo leihatiletan eros daitezke eta 3 euroko prezioa dute.

Bilbao Orkestra Sinfonikoa Musikagileaken kolaboratzaile leialenetako bat da. Izan ere, ostegun honetan bi erakundeen arteko elkarlan estuko hamarkada ospatuko da. Hamar urte horietan, Bilbao Orkestrak Musikagileak Zirkuituaren edizio bakoitza inauguratu du, eta publikoari egungo euskal musikagile askoren eta nazioarteko erreferentziazko egileen musika sinfonikoa ezagutzeko aukera arraroa eskaini dio. Musika berria zabaltzea izan da beti Bilbao Orkestraren helburuetako bat. Bere hastapenetatik, 1922an, BOSek bere programetan euskal edo espainiar konpositoreen obra garaikide ugari sartu izan ditu, orkestrak gaur egun Euskalduna Jauregian egiten duen abonu-denboraldian jarraitzen duen ildoa, euskal konpositoreen eta obra garaikideen programazioarekin.

Urtero, musika garaikidearen aditu handi batek zuzentzen du BOSa kontzertu honetan, Musikagileak gonbidatuta. Geoffrey Patterson, Jean-Philippe Wurtz, Jordi Frances eta Jean Deroyer izan dira azken edizioetako zuzendarietako batzuk, eta oraingoan Pablo Rus Brosetak gidatuko du Bilbao Orkestra. Rus Broseta nazioarteko zirkuituan oso baloratuta dagoen zuzendari espainiarra da. 2015etik Seattleko Orkestra Sinfonikoari lotuta dago, eta, gainera, musika garaikidean aditu bikaina da, Wolfgang Rihm, Hans Zender, Thomas Adès, Magnus Lindberg edo Pierre Boulez bezalako egile ospetsuekin lan egin duena.

Gaua Isabel Garmendiaren (1965) Oroimenak lanaren estreinaldiarekin hasiko da. Gipuzkoar konpositore honen 1. pianorako suitearen orkestrazioa da Oroimenak eta lau mugimendutan banatuta dago: Meditación, Burlesca, Tango eta Barcarola. Proposamen liriko eta tonala da, oso pianistikoa, eta jazzari, bluesari eta beste herri-musika batzuei keinuak egiten dizkie. Ondoren, musikagileak Carmelo Bernaolaren (1929-2002) sorkuntza bat berreskuratuko du, Rondó, 1992an idatzia Madril Europako Kultur Hiriburua ospatzeko. Rondoaren egiturari esker, Bernaolak oreka bat aurkitu zuen musika oso zuzen baten -segidilla erritmodun leloa- eta abstrakzio eta tinbre-sotiltasun handiko pasarteen artean.

Ondoren, Manuel Hidalgoren Soledad Segunda joko du BOSek. Góngoraren Bakardadeak ditu inspirazio-iturri musikagile kordobes gazteak, eta poesia horiekin lotura politiko eta ideologiko bat ezartzen saiatu da obra honetan. Kontzertua amaitzeko, Franck Bedrossianen Le lieu et la formule ikusgarria estreinatuko da Euskal Herrian. Arthur Rimbaud poeta madarikatuaren testuetan oinarrituta, orkestrako musikariek zuzenean esaten dituzte olerkien hitzak, efektu teatral handiarekin.

KONPOSIZIO IKASTAROA ETA 10 KONTZERTU GEHIAGO MARTXOAREN 26RA ARTE

Franck Bedrossian da, hain zuzen ere, Musikagileak urtero antolatzen duen Konposizio Ikastaroa ematera gonbidatu duten musikagilea. Irailaren 20tik 22ra bitartean, Parisko musikagilea, egungo musika frantseseko izen handienetako bat, Espainia osotik etorritako musikagile gazte talde batekin arituko da lanean Musikeneren instalazioetan.

BOSen inaugurazio-kontzertuaren ostean, Musikagileak Zirkuituak beste 10 kontzertu proposatuko ditu, 2022ko urriaren 4tik martxoaren 26ra bitartean, Gasteizen, Bilbon eta Donostian. Talde eta bakarlari ezagunak izango dira kontzertu horien protagonistak, eta guztira berrogeita bederatzi obra interpretatuko dira, horien artean hainbat erabateko estreinaldiak.

-Lehenengo proposamena Feedback Hirukotearen eskutik etorriko da; saxofoiak, akordeoiak eta kontrabaxuak osatutako talde ospetsu honek, urriaren 4an, Donostiako Musikeneko Auditorioan, Sanchez-Verdú, Arias, Erkoreka, Lazkano eta López-Lópezen lanak interpretatuko ditu.

-Urriaren 30ean, Bilboko Guggenheim Museoan, Cuarto de Tono konpainiak ikuskizun multidiziplinarra eskainiko du Gutiérrez, Giner, De Pablo, Erkoreka, Ter Veldhuis, Soper eta Akihoren sorkuntzez osatua.

-Azaroaren 15ean, Quebec-Euskadiren arteko kultur trukeen programaren barruan, Zukan Hirukoteak (txistua, akordeoia eta perkusioa) eta Montrealeko Quasar Saxofoi Laukoteak errezitaldi bateratua eskainiko dute Gasteizko Jesus Guridi Kontserbatorioko Auditorioan, Girard-Charest, Pelz, Chamizo, Gerenabarrena eta Matamororen lanekin.

-Nazioarteko beste talde batek, Moscow Contemporary Music Ensemblek, bi kontzertu eskeiniko ditu Gasteizko Kontserbatorioko eta Musikeneko auditorioetan, azaroaren 27an eta28an, hurrenez hurren. Nóvoa, Luc, Ferrando, Kourliandski, Burtsev eta Svetlichnyren lanak aurkeztuko dituzte.

- Abenduaren 18an, Tramontana taldeak musika maratoi bat eskainiko du Donostiako San Telmo Museoan. 11: 00etan, 12: 30ean eta 17: 30ean doako hiru errezitaldi eskainiko dituzte, eta 19: 30ean amaierako kontzertu bat. Sabio, Carcavilla, Venegas, Gerenabarrena, Álvarez, Catalán, Bernard, Pajón eta Martín bezalako egileen lan ugari defendatuko dituzte egunean zehar.

-Bi egun geroago, abenduaren 20an, eta oraingoan Musikeneko Auditorioan, Eros Jaca biolontxelo-jotzaileak bakarreko eta biolontxelo eta elektronikareko lanak joko ditu, Arias, Echeverría, Lachenmann, Lazkano, Dominguez eta Xenakisenak.

-Jadanik 2022an, urtarrilaren 29an, Gasteizko Jesus Guridi Kontserbatorioko Auditorioan, Vanesa Santanach piano-jotzaileak Dubedout, Arias, Chavarría-Aldrete, García Tomás, Beil eta Thorvalsdottir artisten piezak eskainiko ditu.

-Otsailaren 17an, Francisco Domínguez konpositoreak Akelarre ikuskizuna aurkeztuko du Donostiako San Telmo Museoan. Museoarentzat propio sortutako priektua da, bere artelanen bildumatik eta erakusketa-espazioetatik abiatzen dena.

-Musikagileak Zirkuitua martxoaren 26an amaituko da, San Telmo Museoan egingo den kontzertu sinfoniko-koralarekin. Ensemble Kuraiak eta Bilboko Koral Elkarteak Francisco Escudero musikagile gipuzkoarraren lan karismatikoenetako bat eskeiniko dute, Mitoen Sinfonia.