Andrés Herrera izenarekin jaio zen, baina bere sorterri Sevillan 'Pajaro' izan zen beti. Xehetasunak xehetasun, hiri horretako rockaren historiako izen nagusietako bati buruz ari gara; eta, agian, Espainiakoa. Gitarrista aparta, Brigada Ligera taldean jo zuen. Eta, geroago, hainbat musikari handirekin batera, besteak beste Silviorekin (Fernández Melgarejo), Amador anaiekin Pata Negran, eta baita Kiko Venenoren albumik onenetakoetan. 50 urte betetzear zela bakarkako lehen diskoa argitaratu zuen, 'Santa Leone' (2012) bikaina; eta ondoren 'He matado al Ángel' (2016) eta 'Gran Poder' (2018). Gitarra onak, rock doinuak eta sakontasunez betetako testuak. Ez huts egiteko modukoa.