Berrizko Txintxaun antzerki kolektiboa eszenatokietara itzuliko da 'The full monty' arrakastatsuaren moldaketa pertsonala eskaintzeko, lana aurkitzeko zailtasunen aurrean striper bihurtzea erabakitzen duen langile ingeles talde baten istorioa.

‘The Full Monty’-k, Robert Carlyle eta Mark Addy protagonista ziuen film apartak, mirari txikia lortu zuen iragan mendeko 90eko hamarkadaren hondarrean: guztiok barre egitea, miseriatik ihes egin nahian beren gorputz batere ez ikusgarriak biluztea erabaki zuen galtzaile-koadrila baten gorabeherez.

Urte batzuk geroago, Txintxaun Kolektiboak, Berrizen antzerki amateurraren sugarrari piztuta uzten dion konpainiak, pelikularen antzerti-moldaketa hau sortzeko ausardia izan du. Istorioaren jatorri zinematografikoari gorazarre egin dio bide batez, filmatutako irudiak hezur-haragizko aktoreen lanarekin nahastuz horretarako.

Txintxaunek zintzotasunez heldu dio erronkari, jatorrizkoari leial zaion baina aldi berean bere sustraietatik hurbil dagoen ‘Full Monty’ sortuz. Eta guztiok berriz barre egitea lortu du.