Urtero Amorebieta-Etxanon egiten den Haizetara-Kale Musikarien Nazioarteko Lehiaketak musika hutsaz gozatzeko aukera ematen du: zuzenean jotakoa, kalean bertan, muntaia eszenikorik gabe, eta ikusleak eta musikariak banatzen dituen hesiak baztertuz. Ekainaren 21eko (ostirala) arratsaldetik 23 (igandea) eguneko eguerdira arte, hainbat hautagairen artetik hautatutako nazioarteko bederatzi talde zein baino zein arituko dira, epaimahai espezializatuak eta ikusleenak emandako sariak eskuratzeko. Estilo ugari jorratuko dute: brassa, soinu brasildar eta afrikarrak, funk-a eta swing-a besteak beste. Erabat gomendagarria benetako musikazaleentzat.