Oli Brown blues rock ingelesaren izar berria da, generoaren geroa 'Mojo' aldizkariaren iritziz. Ez da gutxiagorako, Norfolkeko gitarrista, konpositore eta abeslariak lau British Blues Awards irabazi ditu eta, oraindik hogeitaka urte baino ez duela. 'Here I am' da bere hirugarren albuma.

John Landau-k "rock and rollaren etorkizuna ikusi dut eta Bruce Springsteen du izena" idatzi zuen The Real Paper-en; hura parafraseatuz, Oli Brown "bluesaren geroa" dela esan du orain Mojo eragin handiko aldizkariak. Ez dirudi Norfolkeko (Ingalaterra) gitarrista, konpositore eta abeslariak presioa nabaritu duenik, lau urteotan kaleratu dituen lau diskoek  laudorio ugari eta sari garrantzitsuak eman bai dizkiote, zehazki British Blues Awards-eko talderik, albumik, artista nobelik eta ahozko abeslaririk onenaren sariak.

Ez da erraza oilategiko oilarra izatea Eric Clapton, John Mayall eta Peter Green eman dizkigun herrialdean. Baina Brownek entzuleen zein kritikaren onespena jaso du. Jimmi Hendrixen bidez heldu zen bluesera eta Buddy Guyren zintzotasuna eta ikuskizun-sena miresten ditu. Ondo abesten du, generoaren lengoaia menderatzen du eta badaki 12 konpas klasikoak rock aireekin uztartzen, 'Here I am' bere album berrian agerian utzi duenez.