Bilbao BBK Liveren antolatzaileek ikusminari eta jaialdiaren inguruko espirituari eutsi nahi diote urte osoan Rich Robinson partaide izango duen Bilbao BBK Live Bereziak kontzertu-zikloaz. Robinson anaia txikia, The Black Crowes-eko gitarrajole eta kantugilea, Llama blues EPko eta Through a crooked sun albumeko kantuak aldean dakartzala etorriko zaigu, jatorri estatubatuarraz, musika beltzaz eta rock-molde tradizionalez maiteminduta dagoen songwiter edo rock-kantautore klasikoa dela aldarrikatuz.
Hauxe da Atlantako (Georgia) artistaren bakarkako bigarren iraupen luzeko lana. Duela hamar urte inguru Black Crowes-en lehen etenaz baliatu zen Hookah Brown taldea abian jartzeko, baina proiektuak ez zuen aurrera egin eta Robinson-ek erabateko protagonista gisa estreinatu zen 2004an Paper albumarekin, bere nortasuna argi utziz. Circle Sound banda dugu garapen trinkoak gustuko dituen background itzeleko musikari pausatu honen kurrikuluko beste abentura berri bat.